വർഷങ്ങൾക്ക് ശേഷം സഹപ്രവർത്തകയായ രംഭയെ കണ്ട സന്തോഷം പങ്കുവച്ച് നടൻ മനോജ് കെ. ജയൻ. 33 വർഷത്തെ ഇടവേളയ്ക്ക് ശേഷമാണ് ഇരുവരും കണ്ടുമുട്ടിയത്.
മനോജ് കെ. ജയനാണ് ഈ ചിത്രങ്ങൾ ഫേസ്ബുക്കിൽ പങ്കുവച്ചത്. ദുബായി രാജ്യാന്തര എയർപോർട്ടിലെ ബിസിനസ് ലോഞ്ചിൽ വച്ചാണ് ഇരുവരും കണ്ടുമുട്ടിയത്.
തന്റെ പ്രിയപ്പെട്ട സഹപ്രവർത്തകയെ കണ്ട സന്തോഷം മനോജ് കെ. ജയൻ പങ്കുവച്ചത് സർഗത്തിലെ തന്നെ ഹിറ്റ് സംഭാഷണം കുറിച്ചുകൊണ്ടാണ്.
"കുട്ടൻ തമ്പുരാനും തങ്കമണിയും... ഹരിദാസേ നിന്റെ തങ്കമണിയെ ഞാൻ കണ്ടെടാ... 33 വർഷങ്ങൾക്ക് ശേഷം പ്രിയപ്പെട്ട രംഭയെ അപ്രതീക്ഷിതമായി കണ്ടുമുട്ടി; അവളെ കണ്ടതിൽ വലിയ സന്തോഷം. ചിത്രങ്ങൾ പങ്കുവെച്ചുകൊണ്ട് മനോജ് കെ. ജയൻ കുറിച്ചു.
മലയാള സിനിമയിലെ എക്കാലത്തെയും വലിയ ക്ലാസിക്കുകളിൽ ഒന്നാണ് സർഗം. ചിത്രത്തിലെ കുട്ടൻ തമ്പുരാനെ അനശ്വരനാക്കിയ മനോജ് കെ. ജയനും തങ്കമണിയായി വേഷമിട്ട രംഭയും 33 വർഷങ്ങൾക്ക് ശേഷം വീണ്ടും കണ്ടുമുട്ടിയത് ആരാധകരെയും ആവേശത്തിലാക്കി.
1992-ൽ ഹരിഹരൻ സംവിധാനം ചെയ്ത സർഗം മനോജ് കെ. ജയന്റെ കരിയറിലെ ഏറ്റവും വലിയ നാഴികക്കല്ലായിരുന്നു. ചിത്രത്തിലെ കുട്ടൻ തമ്പുരാൻ എന്ന വേഷത്തിലൂടെ മികച്ച രണ്ടാമത്തെ നടനുള്ള സംസ്ഥാന ചലച്ചിത്ര അവാർഡും അദ്ദേഹം സ്വന്തമാക്കി. രംഭയുടെ കരിയറിലെയും ശ്രദ്ധേയമായ വേഷമായിരുന്നു തങ്കമണി.